「屠龍小隊」 勇武派遺書被公開

今日晚上,有人在連登討論區公開一封朋友的遺書,提到他的朋友自稱是前線勇武派「屠龍小隊」的一員,但自10月1日起人間蒸發…… 他遵從朋友意願,在10.1的一個月後公開遺書,抱一點希望想找回朋友,同時想透過遺書內容勉勵大家……

 
以下為原文:
這是一封我朋友寫比我既遺書, 我囑從佢意願, 已經等左足一個月, 試過WHATSAPP, FB ,同去佢租既單位都搵佢唔到, 我唔識佢D屋企人, 所以唔知點搵佢,
同佢係IVE時識,到而家已經15~6年了, 突然一位朋友疑似過身,
我10月份果陣真係好崩潰, 見到呢排連登既氣氛同風向撚, 我真係好撚嬲,
我決定公開佢呢份遺書(EDIT左部份內容), 屌醒你地, 我家下喊住打呢篇野, 真係好辛苦。

我朋友簡介, 化名M, 身高17X, 85年人馬座, 高大威猛, 黑黑實實, 曾任資深兼職救生員, ST.JOHN, 及潛水愛好者、爬山愛好者, 後來考左健身教練牌, 去WTFGG做過, 7月辭職加入勇武, 當時應該單身。
媾女無數,有D賤格, 成日話媾完D女唔要既就介紹我識, 無一次實現, 我雖然已經拍緊拖,但我無話你聽, 家陣我好想同你曬命, 求下你如果未死見到呢封信, FB CALL返我或者打比我, 求求你

遺書日期: 9月30日晚上EMAIL, 我10月1日收到, 已經打唔通,

—————————————————-
呀止:
係未無諗過我會寫email比你呢, 我都無諗過, 但其他人話叫我寫定, 我就寫幾份, 其中一份比你,
另外我有比呀妹同我表哥, 唔洗咁大壓力, 話時話, 呢部機都係你同我砌,開始有D慢, 希望有機會搵你同我砌過部, 到時你要DEL左呢封野, 真係好老尷。

我寫比你因為我覺得你唔敢上最前, 亦都最縮骨, 又有連登account , 可以有機會幫我講返出來, 如果你一兩個月都搵我唔到, 就幫我放上網啦, 我地好多前線都過左48無出返過來。
今晚係第2次我上最前, 聽日我要賀佢老母國慶, 我唔會留手,我地無退路, 亦都唔需要退路,
「不自由、無寧死」, 同榮光歸香港比, 我都係鍾意呢句, 要我地活係不自由當中, 同唔比雀仔飛, 唔比魚游水一樣不可能, 我地都知道人越來越少, 因為前線真係越拉越少, 但我要你應承我, 唔好出來, 你跑得慢又唔大隻, 死硬。
我果隊就係「屠龍小隊」, 哈, 我知個名你有份改, 我係連登見到, 大家都幾中意你呢個名, 但我地點屠龍丫。
我想你幫我同所有人講, 其實我地所謂勇武, 本身都係和理非既一份子, 5年前我好後悔有份係龍和道唱今天我, 到今時今日仍然係我地既一個污點, 我識果五六個前線, 有D得十六七歲, 我無資格勸佢唔好沖, 我唯有衝到比佢更前, 講真唔死我都三十幾歲, 未當還5年前既債囉, 我情願我被捕,都唔想比D畜牲係咁捉女仔, 你話新屋企有無強暴殺人碎屍, 我覺得有。

點解變勇武, 一來我大隻, 運動開, 二來香港真係需要我地。
記得一開始果陣我仲只係一個First Aid, 推急救車仔,跟住嗌下口號.
見到一個個後生仔女傷到見骨, 我真係唔可以一句「好嬲呀」就算,
勇武, 真係被逼出來的, 係會勁驚的, 不過跨過果道欄, 就會越來越唔驚,
我地未必勇過D記者, 只係唔想其他人死傷慘重, 有能力檔兩下, 未上去食幾下囉,
一千幾百蚊買套裝, 我地唔係為型為咩野, 只係都係要保護自己。

月入6萬幾既工, 我都放棄左, 其他手足聽到都O曬嘴, 不過我有信心, 如果無死到, 我都會搵得返呢個人工, 至少我有罷工既勇氣, 有罷工去救救香港既勇氣, 但好多人既三罷聽落嚇一跳, 然後得啖笑, 不過我唔辭都辭左, 希望來緊定返D就搵返份炒散過下日晨。

幫我手講比所有人聽, 我地都成日發現有狗潛入跟隊,甚至放魔法, 不過唔係所有人都係狗, 有D真係手足嚟, 支持就係最大既動力, 雖然我地都戒緊連登。

記得上次同你食飯你問過我, 有D咩野係你地D文弱書生可以做既,果陣時我都答你唔到,
而家我答你, 出來已經係好重要既第一步, 第二步係帶把遮, 第三步就係好好照顧自己同附近既人,

呀止你唔細啦, 仲未拍拖結婚, 多D出來啦, 前中排真係好多好女仔, 識左先, 國家大事搞掂, 總有機會發展兒女私情, 上少D咸網留返D精, 第日你打飛機打到陽痿唔好怪我無提你。

人各有志, 各有所長, 你無須為我感到傷心難過, 話唔定下禮拜我又生勾勾,
希望所有人包括你, 盡力救自己救香港, 救我地既屋企。

萬事小心啦, 我知你都有出來, 但真係要小心, 尤其是返屋企途中, 真係有好多跟尾狗嫁, 變左裝都照捉。

最後都係我果句: 不自由,無寧死 , 要我服從陷家鏟共產黨, no way。

*見字勿覆, 我會轉用太空卡, 有命fb講。

呀M
————————————————————

我有睇勻曬D老豆搵仔、尋人POST, 金晴火眼, 無搵到過佢, 我到今時今日先發現, 我竟然無同佢影過合照, 佢FB得D潛水影魚影龜既相,….
我搵過佢呀妹, 但到今日都未有回應過, 佢好似人間蒸發左咁, 香港真係變得好恐怖, 我地而家係恐怖片面既角色, 係唔可以坐係度等死架!
橫又死, 掂又死, 大家盡做啦。
唔好灰心, 寧作飛灰, 不作浮塵,

我要喊一陣先

Source: https://lihkg.com/thread/1686852/page/1

(63579)

相關文章

搜尋

喜歡我們的文章嗎?按個讚吧!

x